АҚШ Ұлттық аэронавтика және ғарыштық басқармасының (NASA) басшысы Джаред Исаакман SpaceX және Blue Origin өкілдерімен астронавттарды Айға қондыру уақытын жеделдету мүмкіндігін талқылағанын айтты.
«Мен Blue Origin және SpaceX екеуімен де олардың жылдамдату жоспарларын (Айға қону бағдарламасы) талқылау үшін кездестім. Екі жоспар да тамаша, екеуі де техникалық тәуекелді азайтады. Бұл жақсы, бірақ сайып келгенде, бұл өте жиі ұшыру қажеттілігіне әкеледі… бұл үшін сіз оларды қайта пайдалана білуіңіз керек», — деді Исаакман Джон Ф. Кеннеди орталығында өткен баспасөз мәслихатында.
2025 жылдың желтоқсанында АҚШ президенті Дональд Трамп ғарышта Американың артықшылығын қамтамасыз ететін жарлыққа қол қойды. Онда «американдықтарды 2028 жылға қарай Айға қайтару», сондай-ақ 2030 жылға қарай онда тұрақты база құру қажеттігі атап өтілді. Басқа басымдықтардың қатарында Айдың бетінде орналастырылатын ядролық реакторды дамыту аталды – технологиялар 2030 жылға қарай іске қосылуға дайын болады.
SpaceX компаниясын америкалық кәсіпкер Илон Маск басқарады, Blue Origin компаниясы Amazon негізін қалаушы Джефф Безосқа тиесілі. Американдық БАҚ-тың бағалауы бойынша, Blue Origin американдық компаниялар арасындағы SpaceX-тің ең жақын бәсекелесі болып табылады, бірақ әлдеқайда артта қалды. Wall Street Journal бұрын бұл компанияларды Айға ядролық реакторларды жіберу үшін қуатты зымырандармен қамтамасыз ете алатындардың қатарына жатқызған болатын.