Францияда танымал Telegram хабар алмасу қосымшасының негізін қалаушы Павел Дуровқа қатысты іс 8 шілдеде ашылды, іс «аты-жөні белгісіз адамға» қатысты 12 қылмыс бойынша айыпталған. Бұл туралы дүйсенбі, 26 тамызда Париж прокуратурасы хабарлады, — деп хабарлайды Tengrinews.kz РБК-ға сілтеме жасап.
Бұл айыптарға билік органдарымен ынтымақтастық жасамау, кәмелетке толмағандардың порнографиялық суреттерін иелену және таратуға қатысу, есірткіні сатып алуға, тасымалдауға, сақтауға, сатуға немесе беруге қатысу, ұйымдасқан топтың құрамында алаяқтық жасауға қатысу және электронды валюта құралдарын пайдалану кіреді.
Аталған іс сондай-ақ заң шеңберінде ұстап алуды жүзеге асыру үшін құзырлы органдардың сұрауы бойынша қажетті ақпаратты немесе құжаттарды беруден бас тартуға байланысты қозғалды, деп хабарлайды РИА Новости.
Бұған дейін Францияның құқық қорғау органдарындағы дереккөз Reuters агенттігіне француз билігі Дуровты Telegram желісіндегі киберқылмыспен және қаржылық қылмыстармен күресте полициямен ынтымақтасудан бас тартқаны үшін қамауға алғанын айтқан.
39 жастағы миллиардер Павел Дуров 24 тамызда Бакуден жеке ұшақпен келген Париж Ле Бурже әуежайында ұсталды. Оған терроризм, есірткі, алаяқтық және балаларға қарсы қылмыстар бойынша айып тағылуы мүмкін. Бұл айыптармен Дуров кем дегенде 20 жылға бас бостандығынан айырылуы мүмкін.
Дуров қамауға алынғаннан кейін Telegram командасы хабар алмасу қолданбасы ЕО-ның барлық заңдарына сәйкес келетінін, цензура үнемі жетілдіріліп жатқанын және платформа немесе оның иелері оны теріс пайдалану үшін жауапкершілікке тартылады деп болжау қисынсыз деп мәлімдеді.
Франция президенті Эммануэль Макрон Дуровтың «жалғастырылып жатқан сот тергеуі» аясында ұсталғанын және бұл шешімнің «саяси емес» екенін айтты.
X әлеуметтік желісінің иесі Илон Маск Еуропада сөз бостандығына қауіп төніп тұрғанын айтып, Дуровтың қамауға алынуын сынады. Маск Telegram негізін қалаушыны босатуға шақырады.