АҚШ Сауда министрлігі санкциялар тізімін жаңартып, бұл тізімге 123 компанияны қосты. Олардың қатарында Алматы қаласында тіркелген All Global Trading Elektronik Dis Ticaret Ltd Sti түрік компаниясының Қазақстандағы филиалы бар. Дәл осы компанияның Қырғызстандағы филиалы да жазаланды, деп хабарлайды «Халық дауысы» Bes.media сайтына сілтеме жасап.
АҚШ үкіметі ұлттық қауіпсіздікке төнген қатерлерге назар аударады.
«Америка Құрама Штаттары үкіметі бұл субъектілердің Америка Құрама Штаттарының ұлттық қауіпсіздігіне немесе сыртқы саяси мүдделеріне қайшы әрекет ететінін анықтады», — делінген хабарламада.
Түрік компаниясының Қазақстан мен Қырғызстандағы филиалдарынан бөлек, санкциялар тізіміне 64 ресейлік және 42 қытайлық компания, 8 түрік компаниясы, 11 ирандық компания және Канада, Кипр, Украина және БАӘ-ден бір мекеме кіреді.
Басылым атап өткендей, бұған дейін АҚШ пен ЕО-ның санкциялық тізімінде келесі қазақстандық компаниялар болған: Ресейге электронды жабдықтарды, интегралды схемаларды және басқа да қосарлы мақсаттағы тауарларды жеткізгені үшін күдікті «Defence Engineering» ЖШС, «Elem Group» ЖШС және «Da Group 22» ЖШС.
«2024 жылдың маусым айында санкция салынған компаниялардың тізімі Солтүстік Қазақстан облысында тіркелген «KBR-Technology» ЖШС-мен толықтырылды. АҚШ Қаржы министрлігінің мәліметінше, бұл компания бірнеше рет дрондарды құрастыру үшін құрамдас бөліктерді ұсынған.
Бұған дейін тергеуші журналистер жазғандай, Қазақстанда тіркелген үш компания – «KBR-SMT», «KBR-Trans» және «KBR-Technology» санкцияларды айналып өтіп, Ресейге тауар жеткізу тізбегінде делдал ретінде әрекет етеді. Бұл ретте тауар Петропавлға да жетпей, тура Минскіге, одан Мәскеуге барды.
2024 жылдың шілде айының басында Америка Құрама Штаттары ресейлік жеке тұлғалар мен компанияларға қатысты санкциялық режимін өзгертіп, Ресейге санкцияларды айналып өтуге көмектесетін үшінші тұлғаларға екінші реттік санкциялар енгізілетіні туралы үнемі ескертіп отырды», — деп жазды басылым.
Енді үшінші елдердің серіктестері санкцияланған ресейліктермен және ресейлік компаниялармен транзакциялар жасағаны үшін АҚШ билігі тарапынан екінші реттік санкцияларға тап болады.